Lu doi di žun i sji sin cjatâts in plaço a Culino Grando, i erin chei dal cors di culinòt pì ju fruts dal paîsj, par lâ a fâ un gîr cun Nelio. Biel cu inprin lu nuestri "Mestri" al à tacât a contanus des vecjos cjasados cu ero un viaç. La primo cjaso da Culino e fò chê di chei da Murìt ed e jero dongjo dal aip di sòt. Lant indevant cul nuestri gîr i sin rivâts a dulà cu un viaç i paravo adum lu orment. Lu orment, a nus à spleât Nelio,es ero ches vacjos cu d'estât es restavo in paîsj invezo di lâ su i' mont. Un viaç dibot dutos las fameos es vevo uno vacjo par vio lu lat fresc ogni dì. Las fameos pì benestants en vevo cui dôs o, si ero propi sjiors, trio. Chei chi vevo pì di uno vacjo d'estât i las menavo in mont tes bergios di Plumbs u di Morariot, chês cu restavo a cjaso es formavo lu orment. A vuardeâ l'orment a'nd ero un pastuor, che par vio chest puest al fasjevo un concors. Lu pastuor al ero udât de veido, avenastâ un canai di dîsj, undisj ans mandât a ruedol da ogni fameo. Lu pastuor al vevo da sotostâ a un regolament, LU REGOLAMENT DAL PASTUOR; al no podevo lâ tar certs puests... ed al vevo da rispuindi dal so operât al CAPO FRAZION. Daspò Nelio al à tacât a nomenâ un grum di puests: Clap de Scjalo, la Ruvîsj di Stali, Prâts di Stali, in Fontanos, Bosc di Fontanos; cu nuo i no savevin nencj a dulà chi ero. Lant indevant i sin rivâts tar chê che ero la "zono industriâl" di Culino. A'nd ero uno sieo,uno cjarvonero e uno cjalcinero. Lu nuestri Mestri a nus à contât cemuot ches funzionavo, cemuot ches rivavo las taios te sieo, cemuot chi fasjevo lu cjarvon e vio indevant. Fato imò un tic di strado i sin rivâts tal puest chi sji erin prefisâts: un stâli; par vidio cemuot cal ero fat. I sin entrâts tal cjiuot e i vin vidût las trasiofs, lu poni, las grebios, lu cjibi, la trombo, la rojo dal muel, lu prun e lu porteâl. Daspò i sin lâts par soro e i sin entrâts tal stâli. Tal stâli a sji metevo lu fen; soro lu stâli al è lu stai. Tal stai i metevo lu urtigôl, avegnastâ lu segont tai dal fen. Spiant lu stâli i vin vidût la bredolo, lu cancher, lu laç, lu clonfer e lu closter. Lu nuestri gîr al è lât indevant cuntuno bielo mangjado di duolz chi vevin portât devôr; i sin sentâts tal prât i vin mangjât e bivût, favelât e ridût. Con cu ero oro di tornâ indevôr i sji sin inviâts pal bosc, i sin passâts pi runcs e Nelio al à començât a mostranus un'infinitât di plantos. Cussì i vin nomenât lu bedol, lu ambli, lu âl; tra uno planto e che atro i vin vût indiment la sedo: la strico di prât ca sji lassjavo da seâ par fâ da cunfin. E pò indevant cun melesj, savûc, muierâr, sjivilotâr, onglo, brancuduluto, moro di cjan, fau, larç, çafo, brancudulo, sterp, trimul, aier e lavaç. Daspò i vin spiât jù pes Palos e i vin vidût la cal'ero lu martuor e la lissjo; i vin det cu tal bosc al è norbi e i vin cjatât uno grando talto. E fin dal nuestri gîr i sin tornâts a cjaso cul cjâf plen di peravolos novos, cu la speranço di tegnilos adament dutos e cul grant plasjio di essi stâts duludì dopomiesdì cun Nelio.