Chest'an d'issjudo j vin cirût di meti in pont ce chi vevin det te visjinanço dal an passât. A sji ero det di provâ a fâ un "cors di culinot", viert a di ducj. L'ideo e jè lado in puart e, grazies e dispunibilitât dal sjiòr Nelio Toch, j vin tacât a cjatassji par imparâ lu nuestri lengaç. Par imparâ sì, parcè cu ju zovens ben u mâl j an pierdût tantos peravolos ca sji doperavo un viaç e a nol è râr sintî encj cuacu "vecju", o miei cuachidun cun pì esperienço, dî corbelerios italianizzados. A dî la veretât a scuelo a no 'nd ero masso int, como lu solit j vin tacât in tancj e j sin restâts in puosj. Par gno cont e jè stado un'esperienço a dî lu vìor bielo e interessant, oltro al fat chi vin passât un tic di timp in companio. J scuen dî che lu culinot a no l'è dabon fazil da scrivi. J vin imparât un grum di regolos di gramatico e tegnilos adaments dutos a l'è un grant lavùor, encj parcè cu pal prim viaç j vin doperât la novo grafio furlano. Ed e no jè migo finido, a sji scuen dismenteâ las peravolos italianizzados ca sji vevo imparât par regordasji ches justos e, sorodut, j vevin encj ju compits. A displâsj nomo cu no seti vignudo pì int, parcè cu cussì j varessin imbût pì oportunitâts di meti in lont ce chi vevin imparât. Uno rubo che mi à simpri "afasjinât" e jè la FILO. Sintî jù vecjus chi favielo di cuant chi lavo in filo e aì a sji contavo istorios u fats, passant cussì lu timp in companio a gugjâ u a fâ scarpets. Lâ a scuelo di culinot a mi à fat pensâ encj a chescj moments, parcè cu Nelio, oltro a insegnanusi, al contavo encj cuacu fat de so zuvintût. Par gno cont, j no ten l'oro ca torni a tacâ par fâ imò cuatri ridados in companio, sperant cu chest viaç te companio an seti cuachidun di pin.