Un viaç, la gran part di nuestris oms chi no lavo a lavorâ fôr, i restavo in paisj e i fasjievo diviers lavuors. Cuant cu lu Cumun al metevo a l'asto lu bosc tal so teritori, la dito che cjapavo su lu lot e vignivo a Culino par ceri operaris: cussì ju oms restâts a cjaso i lavo a fâ ju boscaduors. Lu lavuor di boscaduor al'ero un grum pesant, ma cui cu vevo mistêr al vignivo paiât como un muraduor! Al tocjavo jevâ buinoro par jessi a tacâ encj devant des siet; tancj viaçs and'ero pì cu un'oro da cjaminâ e cu la cjamo di imprescj (la primo dì) ju boscaduors i rivavo in som chi ero biel stracs. Cuant cu lu lot al'ero cetant lantan e fôr di paisj, esempli in Bordalio, Avanzo, Tuio, ju boscaduors da Culino i sji fermavo in ti casons duto la setemano e i tornavo a cjaso la sabedo. Oltro che sfadiuos, con c'al ero timp da ploio al'ero briuos lavorâ te frato (la plaço dulà ch'es son las plantos tratos jù), par vio ca sji bagnavossji subit. Como tar ducj ju mistêrs pesants i ero encj ju piricui:sbrissjâ con c'a sji ero tal ret, tajassji, ma pin cu atri sul bignâ (ingrumâ lu legnan), cuant cu las taios es vignivo parados jù pi martuors e aloro es podevo cjapâ sot lu boscaduor. Al va da sé che in che volto ju boscaduors i lavoravo cenço machenos. Se a dì di vuio par fâ fôr un lot es lavoro cuatri u cinc personos, un viaç an coventavo almancul coranto u cincuanto. Basto dî che par cjamâ un cjar u un camion al volevo cinc oms: vuio lu sjofèr (autist) dal camion al cjamo dut besuol! Tar un grant lot par solit lu lavuor al'ero dividût cussì: trio cubios (doi oms par cubio) a fratâ (trai jù) ch'es vevo un operari par om a spaça (taiâ ju rams), cuatri u cinc cubios a scjaveçâ (ridusji la planto in taios) e lu rest di boscaduors (circo coranto) ducj te fazituro (a spelâ las taios e a disgropalos). E jero uno grando industrio che di boscj, che in Cjargno e impleavo un grum di int. Basto pensâ che nomo a Fraseniot dal 1951 and' ero vincj boscaduors. Un bot fat, lu legnan al vevo da rivâ in puart par jessi cjamât: al vignivo molât da d'insom lu bosc in dos manieros: tal ret jù pi martuors, in ti boscj chi ero pin in plan ju boscaduors i fasjevo la plancjo u la lissjio. Devant chi rivass ju camions e cuant che nos ero las strados, lu legnan al vignivo mandât jù pal ago. Encj a Culino las taios es vevo da rivâ cu la lissjio tal Fulin dulà c'al'ero lu Puart e di daì d'invier cui mançs las menavo sul Žuof da Gjviano (fin dal 1912 cuant chi an fato la strado di Ruincjo, canussjiudo como strado di Crets). Dal Žuof jù pal martuor, lu legnan al rivavo jù fin a Puint di Lans e daspò, maimò, jù pal ago al rivavo in tes sieos: in Baus, Cjazios e Vilo. Ines Caneva La fiesto di menaus e jero lu dì de Madono di avost e la velio i batevo lu grop. Cun trio taios como las cjampanos: uno picjulo, uno miežano e uno grando. Taios ch'es nos vevo da poiâ sul taregn par dâ fôr lu son, e aì trio boscaduors i batevo sun t'un grop de taio cul cjâf dal manarin: e vignivo fôr uno pario che rasonavo da lantan. Lu grop i lu batevo encj in che dì chi finivo la fazituro e sul puest lu capu, in ocasjion, al portavo un fiasc di vin. La fiesto cul "licôf" e vignivo dopo de misurazion. Lu Cumun u lu paron dal bosc i no misuravo la pi grando taio dal lot ma i la lassjavo a di chei chi vevo lavorâ. Alc al žontavo lu paron c'al vevo cjapât su lu lot e cussì i podevo lâ a mangjâ e bevi in ostario. Lu latisjôl (cicerbita alpina) u radic di mont como chi lu clamo cumò, un viaç al'ero det lu "radic di menaus". Sji jôc chi lu žembavo nomo luor. Cumò nomenât ti grancj otéi e in che volto e sarà stado l'unico virduro cu in ti casons ju menaus i varan mangjât. Notizie di Nelio Toch