Tal 1890 lu consort privât di antîcs origjnaris da Gjviano a l'à scuignut passâ las redinos e aministrazion cumunâl di Rigulât, ma al è specificât: par cont de frazion da Gjviano. Ûs civic, dun- cjo, u ben frazionâl cemuot ca sji volio clamâlu. Chesto situazion e à durât fin al 1924, cuant cu lu guvier fasjist al à impunût lu belanç unic. Ma cun dut a chel, tal 1927, cui provents di Ûs Civics, e iè stado realizado la novo scuelo, lu nôv acuedot e la pedrado jù pal paîsj. Finido la vuero tal '40-45 e lât jù lu guvier fasjist, Gjviano e sji è apelado al Cumisari di Ûs Civics in chel viaç a Vignêsjo cu, vidudos las buinos resjons al à tornât ce c'al ero stât tolet. Tal novembre 1963 e iè stado cuncidudo la pleno separazion di bens frazionâi. In tal libri storic de calonico di Gjviano al è scrit: (voltat dal talian) - "lu Cumisari dai Ûs Civics di Triest a nol à cridut oportun di adivignî e concession di belanç separât, como c'al ero devant de unificazion, ma al à ordenât la completo separazion dii bens frazionâi di Gjviano e de luor separazion de Aministrazion Cumunal di Rigulât. Ai 8.12 di chel an e son stados fatos a Gjviano las primos elezions: i an votât 130 su 195 abitants. Cussì al è lât indevant fin al 1984, cuant par mancjanço di votants, chi vevo da essi residents, l'aministrazion e iè passado a un cumisari nomenât da Udin par daspò passâlo e aministrazion cumunâl di Rigulât. Ma, al è important specificâlu, Gjviano e no à pierdût nissjun dirit, i no son iu Ûs Civics chi son passâts a Rigulât como cu purtrop tanto int e creut, ma nomo l'aministrazion, e iu aministraduors i an lu compit di aministraju par cont de frazion di Gjviano. Cui c'al à provos che la rubo no seti cussì ca sji fasjo indevant. Al à coventât dut chest par rivâ e situazion de strado par Gjviano. Las dos Culinos, imò tal 1910 cui becs dal luor bosc, es an fato la luor strado dal Fulin che passant par Tors e rivo in te statâl te galario par Fòr. Tal 1916 la strado militâr che va su in Crostos, e sji è cjapado intar che strado tal Gravon, ed e ven su viers Gjviano fin a Plan des Clâs, dulà chi clamin dal Volton. Finalmenti tal 1921 al è stât fat l'ultim toc par rivâ in paîsj in part cun finanziaments pii dams di vuero, (da notâ che la strado e và su, de galario fin te alto mont duto in teritori di Ûs Civics) e in part dal cumun da Rigulât. Poben, iu prins triocent metros di chel toc al e imò tal e cuâl che tal 1921, un metro pi streto dal rest (lu prin toc cuatri, lu segont trio, epò trio e mieç e lu toc da Culino cuatri) e nomo cumò c'al stavo par lâ in ruvîsj a sji è pruvidût a trapanâ e meti uncetancj tubos e las tabelos, daspò 80 agns, di piricul, di strado streto e di lavùors in cors (?). E iè la sacrosanto veretât che tar un toc dongjo lu paîsj, par sessanto metros, al è stat fat un lavuor c'al è nomo da laudâ, fato enç in prospetivo, largjo cinc metros, ma bastel cussì? Cumò finalmenti i nus an fat savìo chi son a dispusizion uno grampo di euros chi rivaran apeno par blecâ e miei ce c'al podevo essi fat agnorons indevour. Jò i non posj dî nuio, chi no soi nissjiun, con chi ai fat cualchi damando mi è stât rispuindut cussì:"-Tu, su tu vôs dì alc, presjentocj como candidât. Su tu vens votât bon, se no tu as nomo da tasjo…Democrazio…" Aloro i lassj la peravolo a Gjviano che como i vin vidut e à ducj iu dirits par pratindi ce c'al è just. E lio e disj cussì: -"Jò i no damandi ni doicent ni doi milions di euros, jò i pratint che la me strado e seti fato alunc jù , como chê che và dal Fòr a Culino. Iu mio vecjus i sji son riservâts che part dal gnò bosc pes mes bisignos. Cumò iò i ai grando bisigno par doi mutîfs: un, parcè c'al è just cu daspò otanto agns i vigno cjapâts iu provediments necessaris, segont, parcè t'al pont chi sin, al è lu muot pin important par fami tornâ a vivi. Ce vôlel di: "salviamo la montagna?" I sai c'al mi vignarà mitût sul plat la mancjanço di miets, e al è par chest chi soi achì a dassi la soluzion: ca sjji vieržo un mutuo pojât sul gnò bosc par integrâ ducj iu eventuâi contribûts chi son simpri benvignûts. Fazil, no? Spirin cu chesto e no resti letero muarto e che veti lu just seguit. Un det al dîsj: "- Vuosj di mussj e no vâ in cîl"-. A mi a mi basto che e vado ben ben pin in jù!

Pieri Pinçan, Gjviano 29 žugn 2004